María Toro (A Coruña, 1979) comeza aos 8 anos na música, e dende entón non se separa da súa frauta. Obtén o título superior e tras incursións na música tradicional galega e portuguesa, comeza a explorar outras músicas. Así chega a Madrid no 2005 para estudiar na "Escuela de Música Creativa". Neses anos María recibe diversas becas e premios e comeza a formarse con músicos da talla de Jorge Rossy, Michael Kanan, Benny Golson.... Adéntrase no flamenco formándose con Jorge Pardo, e así nos anos seguintes comeza a traballar con varias compañías de flamenco que a levaron a actuar por todo o mundo. No 2011 trasládase a New York, onde traballa nos espazos máis emblemáticos: Blue Note, Joe ́s Pub, 55th Bar.... compartindo escenario cos nomes como Savion Glover, Richard Bona, Jean-Michel Pilc, Ross Pederson... Aquí grava o seu primeiro disco "A Contraluz". A mediados do 2013 vaise a vivir a Rio de Janeiro, á vez que compaxina traballos en New York e Europa. E precisamente estes novos sons brasileiros deixarán pegada no seu traballo "Araras", un fermoso proxecto no que contou con colaboracións da talla de Hermeto Pascoal. Na actualidade está a presentar o seu último proxecto "Fume", un traballo co que pecha esta tríloxía dun camiño que comeza en Nova Iorque, pasa por Río de Janeiro e remata en Xerdiz, a súa aldea. Unha triloxía que contén as experiencias percorridas polo mundo para acabar volvendo á orixe, á esencia de todo o que ela é-
